ဝဋ်ကြွေးဆိုတာ

“၀ဋ်” တဲ့။ ၀ဋ် ဆိုတာဘာလဲ?? “၀ဋ်” ဆိုတာ ပါဠိစကား “၀ဋ” မှဆင်းသက်လာတဲ့စကားပါတဲ့။ အဓိပ္ပါယ်က တော့ သံသရာလည်ပတ်ခြင်း၊ အကြောင်းပြီးအကျိုး၊ အကျိုးပြီးအကြောင်း ဆက်စပ်ဖြစ်ပေါ်ခြင်း၊ မကောင်းမှု ပြုသည့်အတွက် သံသရာဘ၀ခရီးမှာ ဆိုးကျိုးတစ်စုံတစ်ရာကို ခံစားရခြင်းဆိုတာတွေဖြစ်ပါတယ် လို့ ဗုဒ္ဓဘာသာ ကောင်းတစ်ယောက် စာအုပ်မှာဖော်ပြထား ပါတယ်။

တစ်ခါတစ်ရံ အမေပြောနေကျ စကားတစ်ခွန်းရှိပါတယ်။ အဲဒါကတော့ “ငါဟာ ၀ဋ်ကြွေးတွေ ပေးဆပ်နေရတာ” တဲ့လေ။ ဟုတ်ပါတယ်၊ အမေဟာ ယခုချိန်ထိ သူ့ရဲ့ မိခင်အိုကြီိးနဲ့ ကျွန်မလို ကျန်းမာရေးမကောင်းတဲ့ သမီး ကြောင့်၊ စိတ်ရှုပ်နေရမှုဒဏ်ကိုဆက်လက် ဒုက္ခခံနေရတုန်းပါ။ ဘယ်နေရာကိုသွားသွား ကျွန်မတို့ကြောင့် နောက်ဆံတင်း နေရတာကလည်း အမှန်ပဲဖြစ်ပါတယ်။ ဒါ့ကြောင့် အမေ့အပေါ် ကျွန်မအားနာမိတဲ့စိတ်က တစ်ခါတစ်ရံဆိုသလို ဖြစ်ပေါ်တတ်ပါတယ်။ ဒါပေမယ့် အမေ့ဆန္ဒကိုလွန်ဆန်ပြီး ကျွန်မဘယ်တော့မှ မတားမြစ် ခဲ့ဖူးပါဘူး။ တကယ်တမ်း စဉ်းစားကြည့်ရင်တော့ လူတိုင်းမှာဝဋ်ကြွေးဆိုတာ ကိုယ်စီကိုယ်စီရှိကြတာပဲလို့ ကျွန်မ ယူဆတယ်။ မဟုတ်ဖူးလား ၊ အမေ့ရဲ့  ဖက်ကကြည့်တော့မှန်ပေမယ့်လည်း၊ တဖက်က အမေ့မိခင်ဆိုတဲ့ အဖွားဖက်ကရော သူဒီလောက်အထိ အသက်ရှည်ရှည်နေချင်ပါ့မလား။ အိုခြင်းကြောင့်ဖြစ်ရတဲ့ မျက်စိမမြင်ခြင်း၊ နားထိုင်းခြင်း၊ အစာစားရန်သွားများမရှိတော့ခြင်းစတဲ့ ဒုက္ခတွေကအများကြီးလေ။ ဒါတောင် အခြားကျန်းမာရေး က ကောင်းနေလို့သာပေါ့။ ကျွန်မကတော့ အဲလိုမျိုးနှစ်ဦးနှစ်ဖက်ကို အမြဲယှဉ်ကြည့်မိလို့ပါ။ ဘယ်သူ့ကိုမှအပြစ် တင်တာတော့မဟုတ်ပါဘူး။

ကျွန်မကျတော့လည်း ကျန်းမာရေးမကောင်းတာကြောင့် ရောဂါဝေဒနာတွေကို တစ်ခုပြီးတစ်ခု ခံစားနေရပြီး စိတ်သွားတိုင်းကိုယ်မပါနိုင်ပဲ ကိုယ်လုပ်ချင်တာလေးတောင် ဖြစ်ဖြစ်မြောက်မြောက်မလုပ်နိုင်ခဲ့ဘူး။ ကျွန်မ အတွက်လည်း ရောဂါဝေဒနာတွေခံစားပြီး နေထိုင်နေရတာကလည်း ၀ဋ်ကြွေးပဲလို့ဆိုနိုင်တာပဲလေ။ အဲဒီလိုပါပဲ၊ အားလုံးကိုမြင်တတ်ရင် အားလုံးဟာလည်း သူ့ဝဋ်ကြွေးနဲ့သူပါပဲ။ ကိုယ်နဲ့အနီးစပ်ဆုံးတွေကိုပဲ တွေးကြည့် မြင်ကြည့် လို့ရပါတယ်။ ဥပမာ.. ကျွန်မတို့အိမ်မှာ လာရောက်လုပ်ကိုင်ပေးနေကြတဲ့ သွေးရင်း မဟုတ်တဲ့ ညီမတွေ၊ သူတို့တစ်တွေရော ၀ဋ် ရှိလို့သာ သူများအိမ်မှာ လာရောက်လုပ်ကိုင်ပေးနေကြရတာ ပဲမဟုတ်လား။ ဒါလည်း သူတို့အတွက် ကံကြမ္မာကပေးတဲ့ ၀ဋ်ကြွေး လို့ဆိုနိုင်တာပဲလေ။ လူတိုင်းလူတိုင်း ကောင်းကံ မကောင်းကံ ဆိုတာတွေပြုမိကြမယ်။ အဲဒီပြုမိတဲ့ကံအတိုင်း ပုံစံတူပြန်ခံစားရတာကို ၀ဋ် ခံရတယ်လို့ခေါ်ကြ တယ်မဟုတ်လား။

ကျွန်မတို့ရဲ့အတိတ်ဘ၀က မကောင်းမှုအကုသိုလ်များကြောင့် သည်ဘ၀မှာသည်လို ခံစားနေရခြင်းပါ။ အကြောင်းတရားကြောင့် အကျိုးဖြစ်သည်ဆိုသည်ကို ယုံမှားဖွယ်မရှိ၊ လက်ခံကြရပါမယ်။ ကျွန်မတို့လို ကျန်းမာရေးမကောင်းတဲ့ သူတွေဟာလည်း အတိတ်ဘ၀က သတ္တ၀ါတွေကို မတရားသဖြင့် ညှင်းပန်းနှိပ်စက် ခဲ့မယ်၊ သတ်ဖြတ်ခဲ့မယ်၊ ဒီကံတွေရှိခဲ့ဖူးလို့ဆိုတာ ဗုဒ္ဓဘုရားရှင်က ဟောကြားထားပြီးသားပါ။ ဗုဒ္ဓဘာသာဝင် တိုင်းလည်း သိရှိပြီးဖြစ်ပါလိမ့်မယ်။ အဲဒီကံကြောင့် ဒီဘ၀မှာ ဒီလိုဖြစ်နေရတာပါပဲ။ ဒါကြောင့် ၀ဋ်ကြွေးဆိုတာ လူတိုင်းနဲ့ သက်ဆိုင်လာတဲ့ ကိစ္စလို့ ကျွန်မမြင်ပါတယ်။

ကိုယ်တစ်ဦး တစ်ယောက်တည်းကသာ ၀ဋ်ကြွေးရှိနေပြီး အခြားသူများက ၀ဋ်ကြွေးမရှိပဲ နေထိုင်နေကြသူ များ လို့မဆိုနိုင်ပါဘူး။ ယခင်ဘ၀ ဘ၀ကအကြောင်းများကြောင့်သာ အနည်းအများအလိုက် ၀ဋ်ခံကြရတာပါ။ ကျွန်မတို့ဗုဒ္ဓရှင်တော်မြတ်ဘုရားတောင်မှ ၀ဋ်ကြွေး အမျိုးမျိုးခံခဲ့ရသေးတာ ကိုသိနိုင်ပါတယ်။ ကဿပဘုရားရှင် လက်ထက် ဇောတိပါလပုဏ္ဏားဘ၀က “ငါဆိုလျှင်ခြောက် နှစ်ကျင့်မည်”ဟု ပြစ်မှားခဲ့ဖူးသော ၀စီဝိပါက်တော် ကြောင့် ဒုက္ကရစရိယာခြောက်နှစ်ကျင့်ခဲ့ရသလို၊ ဆေးဆရာဘ၀တစ်ခုမှာ ဆေးကုခမပေးချင်လို့ “မသက်သာပါလို့” လိမ်တဲ့ဝေဒနာရှင်ကို ၀မ်းနှုတ်ဆေးလိမ်တိုက်ခဲ့တဲ့ ကံကြောင့် ပရိနိဗ္ဗာန်ပြုခါနီး ၀မ်းတော်သွန် တဲ့ ရောဂါဖြစ်ခဲ့ရပါသေးတယ်။

အရှင်မောဂ္ဂလန်လည်း ရဟန္တာဖြစ်ပေမယ့် တခုသောဘ၀က ပြုလုပ်ခဲ့တဲ့ မိဘတွေကို ရိုက်သတ်ခဲ့တဲ့ အတိတ်ကံ က နောက်ဆုံးဘ၀မှာ ရဟန္တာ ဖြစ်နေတာတောင် ကိုယ်ပြုခဲ့တဲ့ အမည်းကံကြောင့် ၀ဋ်ကြွေးကို အကြေပေးဆပ် ရပါသေးတယ်။ ဘာလိုပဲဖြစ်ဖြစ် ကိုယ်ပြုလုပ်ခဲ့မိတဲ့ကံဟာ ဘ၀ပေါင်းများစွာကို အရိပ်လိုလိုက်ပြီး အကျိုးပေးပါ တယ်။ ကံ နဲ့ ၀ဋ် က ဆက်စပ်နေပါတယ်နော်။

ကံက အကျိုးပေးလာပြီဆိုရင်တော့ ဘုရားသော်မှ တားပေးလို့ မရပါဘူးတဲ့။ အဲဒီလို အကုသိုလ်ရဲ့ အကျိုးခံစားရတာကိုပဲ ၀ဋ်လည်တယ်လို့ ပြောတတ်ကြပါတယ်။ ဒီတော့ ၀ဋ် ဆိုတာ ကံသာလျှင် ဖြစ်ပါတယ်။ ကံရဲ့ အကျိုးဆက်မျှသာဖြစ်ပါတယ်။

ဝဋ်သုံးပါးရှိပါတယ်။
၁။ကမ္မ၀ဋ်
၂။ဝိပါက၀ဋ်
၃။ကိလေသ၀ဋ် တို့ ပါ။
ဒီသုံးပါးထဲက ၀ဋ်လည်တယ်။ ၀ဋ်လိုက်တယ်လို့ အပြောခံရတဲ့ ၀ဋ်ကတော့ “၀ိပါက၀ဋ်” ပဲဖြစ် ပါတယ်။

ဤပိုစ့်နဲ့ ကျေးဇူးရှင်မိခင်အား ကန်တော့ပါသည်။
(ဤပိုစ့်သည် မိခင်အားတစ်စုံတစ်ရာပြစ်မှားခြင်းမရှိပါ) စာဖတ်သူများအထင်မှား၊ အမြင်မှား မည်စိုးပါသဖြင့် ကြိုတင်ပြောကြားခြင်းဖြစ်ပါသည်။

မှတ်ချက်။ “၀ဋ်” ပိုစ့်မှလိုအပ်သည်ကိုအသုံးပြုခွင့်ပေးသော ဂျေဂျူဝိုင် ကိုလည်း ကျေးဇူးတင်ပါသည်။