တပေါင်း တန်ခူး မိုးသားကြူးသည့်နွေရာသီအခါသမယ၌အခြားသောသစ်ပင်ကြီးများမှာ ရွက်ဟောင်း ကြွေ၍ ရွက်သစ်ထွက်စပြုချိန်တွင် မြင့်မြင့်မားမားခန့်ညားလှသော ပိတောက်ပင်တို့ကား ရွက်စိမ်းရွက်စိုတို့ ဖြင့် ဝေဆာလျှက်ရှိလေသည်။ထို့ပြင် မြစိမ်းရောင်အရွက်အခက်တို့  ကြားမှ ရွှေအဆင်းကဲ့သို့ ဝါ၀င်းသော ပိတောက်ပန်းတို့ ကား ပင်လုံးကျွတ် မြိုင်မြိုင်ဆိုင်ဆိုင် ဖူးပွင့်ကြကာ၊ သင်းပျံသည့်ရနံ့ ကို ၀န်းကျင်တစ်ဝှိုက်ပြန့် နှံ့ စေတော့သည်။ ဤသည်ကား ပန်း ပိတောက်၏ ထူးခြားချက်ဟုပင် ဆိုချင်ပါသည်။
ထို့ ကြောင့်လည်း “ သိဂီ င်္မြညှောင့်၊ ပန်းပိတောက်တို့ 
ဖြိုးမောက်ရွှင်လန်း၊ ထူးဆန်းလှတင့်၊
ရိုးတံမြင့်နှင့်၊ ပွင့်ကြကြိုင်သင်း၊
မြိုင်လုံးဝင်းမျှ……………………” ဟူ၍လည်းကောင်း
“ မြိုင်မှာမြိုင်လျှောက်၊ ရွှေပိတောက်လည်း၊
ဖူးညှောင့်ပွင့်ချိန်……………………………….” ဟူ၍လည်းကောင်း
ရှေးမြန်မာ စာဆိုရှင်ကြီးများသည် ပိတောက်ပန်းများ ပွင့်ချိန်တွင် မြိုင်ချေရိပ်ခွင်၏ သာယာ တင့်ဆန်းပုံကို ကဗျာလကာင်္များ သီကုံးစပ်ဆိုခဲ့ကြသေးသည်။
ထိုသို့  ပူပြင်းခြောက်သွေ့ သောအချိန်အခါ၌ တောတောင်ရေမြေတို့ ကို သာယာရှုမောဖွယ် ဖြစ်အောင် ဖန်တီးနိုင်စွမ်းသည့် ပိတောက်ပင်တို့ ကိုမြန်မာနိုင်ငံအနှံအပြားတွေ့ မြင်နိုင်သည်။သဲနှုံးမြေဆန်၍ ရေမ၀ပ်သောဒေသတို့ ၌ ပိတောက်ပင်များ ပိုမိုဖြစ်ထွန်းသည်ဟု သိရသည်။
ပိတောက်ပင်တို့ သည် အမြင့်ပေ၆၀ မှ၈၀ ထိရှိတတ်ကြသည်။ တပေါင်းလမှစ၍ သုံးကြိမ်တိုင် ပွင့်သည်ဟုဆိုသည်။ မွှေးပျံသင်းကြိုင်၍ ၀ါဝါ၀င်းဝင်းရှိကြသော ပိတောက်ခိုင်၊ ပိတောက်ခက် တို့ သည် အဆုပ်လိုက် အခဲလိုက် ၀င်းထိန်အောင် ပွင့်တတ်ကြပေသည်။
ပိတောက် သုံးကြိမ်ပွင့်ပြီးလျှင် မိုးဖြိုင်ဖြိုင်ရွာ၍ မိုးရာသီအစပြုသည်။ မြန်မာလူမျိုးတို့ သည် ပိတောက်ပွင့်သည့် အကြိမ်ကိုရေတွက်ကာ မိုးရာသီကိုစောင့်မျှော်တတ်ကြသည်။ မြန်မာနှစ်သစ်ကူးချိန်ဖြစ်သော သင်္ကြန်တော်အခါနှင့်လည်း ပိတောက်ပွင့်ချိန်နှင့် ကြုံကြိုက် တတ်ရာ ရေပက်ခံထွက်သူ၊ရေပက်သူအမျိုးသမီးများသည်ပိတောက်ပန်းများကိုအားရပါးရ ပန်ဆင်ကြလေသည်။ ပိတောက်ပန်းခက်များကိုလည်းဘုရားတင်လှူ၍လည်းကောင်း၊ရေပက်ခံမော်တော်ကား၊ရေပက်မဏ္ဍပ်များ၌ အလှဆင်ချိပ်ဆွဲ၍လည်းကောင်း မြင်တွေ့ နိုင် ကြပါသေးသည်။ လူငယ် အတော်များများကပင် ပန်းပိတောက်နှင့် သင်္ကြန်ကို တွဲဖက်၍ မြင်နေကြပြီ ဖြစ်သည်။ သင်္ကြန်သည် ပိတောက်ပန်းပွင့်သည်၊ သင်္ကြန်တွင်ရွာသော မိုးစက်လေးများ ကျလာလျှင်ပင် ပန်းပိတောက်တို့ ပွင့်သည်ဟု မှတ်ထင်လေ့ရှိကြသည်။ အမှန်တော့ တပေါင်းတန်ခူးအချိန် သည် ပိတောက်ပန်းပွင့်သောအချိန်ပင် ဖြစ်လေရာ၊ တိုက်ဆိုင်မှု ဟုပင်ဆိုနိုင်ပါသည်။
မည်သို့ ပင်ဆိုစေ ပန်းပိတောက်သည် အလွန်ပင်ရနံ့ မွှေးသောပန်းအဖြစ်လည်းကောင်း၊ လူအများနှစ်သက်သော ပန်းအဖြစ်လည်းကောင်း ထင်ရှားနေလေသည်။ သင်္ကြန်အခါသမယ နှင့် ကြုံကြိုက်သောကြောင့်လည်း ပိုမိုအသိအမှတ်ပြုခံရခြင်း၊ အထွဋ်အမြတ်ထား ခံရခြင်းဖြစ် သည် ဟုဆိုရပေမည်။
အနမ်း(သုခုမ)
ကိုးကား_ မြန်မာ့ စွယ်စုံကျမ်း အတွဲ(၆)
0 ယောက်ဆွေးနွေးချက်:
Post a Comment